Беҙҙең проекттар

19.07.2018

Балалар өсөн ниндәй генә лагерҙар, һауыҡтырыу һәм ял үҙәктәре юҡ. 1999 йылдан бирле эшләүсе "Йәйләү" регион-ара лагерь тураһында белмәгән кеше һирәктер. Бында йыл һайын Башҡортостандан ғына түгел, күрше өлкәләрҙән, Мәскәү, Санкт-Петербург ҡалаларынан йөҙәрләгән бала ял итә. 

Бөгөн "Күпер"ҙә "Йәйләү" лагерында ял итеп ҡайтыусы Дания Ғәзизова һәм уның әсәһе, БР-ҙың атҡаҙанған уҡытыусыһы Илмира Миҙхәт ҡыҙы.(18 июль тура эфирынан яҙма.)

12.07.2018

Дуҫтар, беҙ һеҙҙе Тыуған илен, туған телен яратҡан дәртле, уңған, тырыш, һәләтле йәштәребеҙ менән таныштырыуыбыҙҙы дауам итәбеҙ. Тап шундай йәштәр ойошторҙо ла инде июль башында Баймаҡ районы Талҡаҫ буйында үткән "Аҫылташ - 2018" форумын. Һәм бөгөн беҙҙең студияла ошо матур, ҙур әһәмиәткә эйә сараны ойоштороусы, унда ҡатнашыусы йәштәр үҙҙәре: Рузилә Юлыҡова, Айзилә Мөлөкова, Рамазан Әхмәҙин.(11 июль тура эфирынан яҙма.)

05.07.2018

"Урал батыр" эпосын йәш башҡарыусыларҙың республика бәйгеһе тураһында Башҡортостанда ишетмәгән-белмәгән кеше һирәктер. Быйыл ул тағы ла Бөрйән ерендә, инде 20-се тапҡыр үткәрелде. Бәйгелә йылдағыса Башҡортостандың төрлө төбәктәренән халыҡ ижадына мөкиббән киткән, халҡыбыҙ тарихына битараф булмаған ҡыҙҙар һәм егеттәр ҡатнашты. 

Беҙ үҙебеҙҙең тапшырыуҙарҙа бәйгелә ҡатнашыусылар, еңеүселәр, балаларҙы конкурсҡа әҙерләүсе етәкселәр менән йыл һайын осрашыуҙар ойоштороп торабыҙ. Бөгөн дә беҙҙең студияла "Урал батыр" эпосын йәш башҡарыусыларҙың республика бәйгеһендә ҡатнашыусылар: бәйгенең Гран-при хужаһы Ишембай ҡалаһының Зәки Вәлиди исемендәге 2-се башҡорт гимназия-интернаты уҡыусыһы, Хәйбулла ҡыҙы Гөлсәсәк Шәрипова; 1-се урын яулаусы, ошо уҡ гимназияның 6 класс уҡыусыһы Ғәлиә Шәрипова һәм уларҙың етәксеһе, гимн...

29.06.2018

Мәктәптәрҙә уҡыу тамамланыу менән йәйге ял лагерҙары гөрләп эш башланы. Ғәҙәттә, лагерҙар ниндәйҙер бер юҫыҡта алып барыла: кемдәрҙер сит тел өйрәнә, берәүҙәр өсөн спорт йүнәлеше яҡыныраҡ. Һанай китһәң, ял лагерҙарының төрҙәре бик күп. Иң мөһиме - балалар тәбиғәт ҡосағында ял итә ала, тыуған яҡ үҫемлектәре, тау-күлдәре менән таныша ала. Шулай уҡ ял менән хеҙмәтте сиратлаштырған лагерҙар эшләй. Мәктәп яны баҡсаһында уҡыусылар үҙ ашханалары өсөн емеш-еләк үҫтерә. Бөгөн студия ҡунаҡтары Ф.Мостафина исемендәге 20-се ҡала башҡорт мәктәбенең йәйге "Ҡурай" лагерының етәксеһе Айгөл Абдулнафиҡ ҡыҙы Кәлиева һәм ошо лагерға йөрөүсе Алһыу Ғарипова менән әңгәмә ҡорабыҙ. (27 июнь тура эфирынан яҙма)

21.06.2018

Бөгөнгө "Күпер"ҙе "Мин - башҡорт" тигән йырҙан башланыҡ. Сөнки бөгөн беҙҙең студияла үҙ милләтен, тыуған илдәре Башҡортостан данын бөтә Рәсәйгә танытыусы, үҙҙәренең һәләттәре менән бөтә ил халҡын таң ҡалдырыусы ҡыҙҙар. Һеҙ, әлбиттә, уларҙы бик яҡшы беләһегеҙ: Учалы ҡыҙы, "Синяя птица" Бөтә Рәсәй йәш таланттар конкурсы финалисы 10 йәшлек Ләйсән Золотарева, Әбйәлил ҡыҙы, НТВ каналында барған "Ты-супер!" социаль музыкаль проект ҡатнашыусыһы 15 йәшлек Зарема Шәйхетдинова һәм Салауат районы һылыуы, "Голос.Дети" проекты ҡатнашыусыһы 14 йәшлек Наҙгөл Отузова. Студиябыҙҙың тағы бер ҡунағы - Ләйсәндең атаһы Ирек Әсхәт улы. (20 июнь тура эфирынан яҙма.)

30.05.2018

Бөгөн беҙҙең студияла Ҡош юлынан яңы юл ярыусылар, яңы ҡанат ҡағыусылар, тәүге, әммә ышаныслы аҙымдарын яһаусылар - "Ҡош юлы.Балалар" проектында ҡатнашып, финалға сығыусылар: Әбйәлил районы Асҡар ауылынан Нәркәс Баймырҙина, Бөрйән районы егете Алмаз Ғәбитов һәм проектты етәкләүселәрҙең береһе режиссер Ләйсән Мәзитова. 

24.05.2018

Мәктәптәрҙә яңғыраясаҡ һуңғы ҡыңғырау байрамына теп-теүәл бер көн ҡалды. Ҡыңғырау моңона сорналып, шау-шыулы, күңелле мәктәп йылдары, ғәмһеҙ бала саҡ артта ҡаласаҡ.Ә алда һикәлтәле һуҡмаҡтары, борма-борма юлдары, борсолоуҙары, шатлыҡ-ҡыуаныстары менән үҙаллы тормош.  Әҙерме һуң улар, кисәге мәктәп уҡыусылары, оло тормош юлына баҫырға? Нимәһе менән улар хәтерендә ҡалған мәктәп йылдары. Был турала белергә теләһәгеҙ, беҙҙең менән ҡалығыҙ, дуҫтар!

 Республика мәктәптәрен быйыл 18 меңдән ашыу уҡыусы тамамлай. Улар араһында студиябыҙҙың бөгөнгө ҡунаҡтары ла бар. Кемдер репетициянан, кемдер дәрестәрҙән сығып, беҙҙең менән осрашыуға килгән. Әйҙәгеҙ, ҡунаҡтарыбыҙ менән яҡынданыраҡ танышайыҡ.

 Улар: Ҡасим Дәүләткилдеев исемендәге һынлы сәнғәт гимназия-интернатынан Нурзилә Мөлөкова менән Юламан Юламанов, Р...

17.05.2018

16 майҙа "Башҡортостан" дәүләт концерт залында "Бирешмә" төркөмө изгелек һәм дуҫлыҡ байрамы уҙғарҙы. Төркөмдөң концертынан йыйылған аҡса Ғафури районында йәшәүсе Руслан Шәрәфетдиновтың һаулығын нығытыуға ярҙам буласаҡ. (16 май эфирынан яҙма)

03.05.2018

Ҡурай - тынлы музыка ҡоралы. Ғәҙәттә, үләндән ҡырҡып алып, тишектәр уйып эшләйҙәр. Төрҙәренә килгәндә улар бик күп төрлө. Ҡурай хаҡында ҡыҙыҡлы мәғлүмәттәрҙе бөгөнгө тапшырыуҙан ишетерһегеҙ, дуҫтар. "Күпер"ҙең  ҡунаҡтары - Юнир Һағынбаев һәм уның өйрәнсектәре - йәш ҡурайсылар Илмир Баязитов, Әғләм Юлгилдин. (25 апрель эфирынан яҙма.)

19.04.2018

Дуҫтар, беҙ һеҙҙе тылсымлы ла, серле лә әкиәт иленә саҡырабыҙ. Бөгөн беҙҙең студияла ҡунаҡта халыҡ ижадына ғашиҡ, бигерәк тә әкиәттәр яратыусы ҡыҙҙар, малайҙар һәм уларҙың ата-әсәһе. Улар әкиәттәрҙе уҡып, тыңлап ҡына ҡалмай, үҙҙәре лә шул тылсымлы әкиәт илендә йәшәй, әкиәт геройҙары булып донъяға баға, улар исеменән беҙҙе яҡшылыҡҡа өндәй, изгелектең яуызлыҡты еңеүен иҫбатлай. Борон-борон заманда түгел, беҙҙең көндәрҙә... Улар донъя халыҡтары әкиәттәрен башҡорт телендә һөйләүселәрҙең "Һаумы, һаумы, әкиәт!" конкурсының район этабы еңеүселәре 95-се балалар баҡсаһынан 5 йәшлек Арыҫлан Ҡырымсурин, 40-сы балалар баҡсаһы тәрбиәләнеүсеһе 6 йәшлек Искәндәр Йосопов. Шулай уҡ Искәндәрҙең әсәһе Альбина Ришат ҡыҙы һәм Арыҫландың атаһы Вәғиз Баязит улы ла беҙҙең студияла. (18 апрель тура эфирынан яҙма.)

...
13.04.2018

Бөгөн беҙҙең студияла "Тамыр" каналы ойошторған "Сулпылар" - 2004 Республика телевизион йыр-моң конкурсы, республика,  Рәсәй, халыҡ-ара кимәлендә үткән бәйгеләр еңеүсеһе популяр йәш йырсы Илнур Рамазанов.

13.04.2018

"Шаяниум" шаяндар һәм отҡорҙар ҡала конкурсы 16-сы тапҡыр гөрләп үтеп китте. Быйылғы бәйгелә күп командалар ҡатнашты. Шаяндар һәм отҡорҙар конкурсында Гран-при яулаусылар бөгөн беҙҙең студияла. Республика инженер лицей-интернатының "Башҡорттар.РУ" командаһы егеттәре улар.

29.03.2018

Мәктәптә уҡыу - бала саҡтың иң сағыу мәле. Иң мөһиме - ҡуйылған билдәләр ҙә, уҡытыу ысулдарының төрлөлөгө лә түгел. Иң мөһиме - хәүефһеҙлек. Бөгөнгө алып барасаҡ әңгәмәбеҙ каникулдар осоронда хәүефһеҙлек хаҡында. Студия ҡунаҡтары Ирхан һәм Мораҙым атлы шәп егеттәрҙе тәрбиәләүсе Әлфиә һәм Вадим Хәбировтарҙың татыу ғаиләһе.

23.03.2018

Һәр быуын үҙенән аҡыллыраҡ, тәрбиәлерәк, зиһенлерәк алмаш ҡалдыра алһа ғына, кешелек донъяһында үҫеш була.Кеше ғүмерен  тәрбиәле балалары, изге эше, уның хаҡындағы яҡты иҫтәлектәр дауам итә, тиҙәр. Ә беҙ һәр көн зәңгәр экрандарҙан ҡараған, радионан тыңлаған, сәхнәләрҙән күреп шатланған йондоҙҙарҙың ғаилә ҡорорға, үҙҙәренән һуң лайыҡлы алмаш ҡалдырырға ваҡыты, ә иң мөһиме - теләге бармы икән? Ошо турала серләшергә беҙ бөгөн Мостай Кәрим исемендәге милли йәштәр театры актеры "Бабич" фильмында төп ролде башҡарыусы һәләтле актер Илгиз Таһировты саҡырҙыҡ. Ул беҙгә яратҡан ҡатыны Әлфиә Ғайса ҡыҙы, улдары Алмаз һәм Азамат менән килде.

12.03.2018

Матурлыҡ донъяны ҡотҡарыр тиҙәр. Ә нимә һуң ул матурлыҡ? Матур булып һаналыр өсөн тышҡы матурлыҡ етәме, әллә эске донъяң да матур булырға тейешме? Бөгөн һүҙебеҙ матурлыҡ тураһында һәм беҙҙең студия ҡунаҡтары - "Һылыуҡай-2018" республика гүзәллек бәйгеһенең ойоштороу комитеты ағзалары: продюсер Асия Шахмина, режиссер Гөлсәсәк Игебаева, жюри ағзаһы Рөстәм Абдразаҡов һәм бәйгеселәрҙең береһе Әлфинә Кашапова.

22.02.2018

Дуҫтар, "Ҡош юлы.Балалар"  башҡорт бард йырының яңы телевизион конкурсы старт алды. Бөгөн беҙҙең студияла Ш.Бабич исемендәге йәштәр дәүләт премияһы лауреаты, "Ҡош юлы" фестивале лауреаты, Мәжит Ғафури исемендәге Башҡорт академия драма театры актеры, "Ҡош юлы.Балалар" конкурсы остазы Артур Кәбиров, конкурсант Алтынай Вәлитова һәм проекттың режиссеры Ләйсән Мәзитова.

15.02.2018

Баланы 4-6 йәштә китап уҡыуға йәлеп итә торған ваҡыт. Fалимдар фекеренсә, тап ошо йәш китап донъяһы менән таныштырыу өсөн уңайлы икән. 6-7 йәштән һуң балаларҙы уҡырға өйрәтеүе ауырға төшә, тиҙәр.Компьютер заманында балалар уҡырға ауыр өйрәнә, китап уҡымай, тип зарланырға яратабыҙ. Ә ысынында,беҙҙең тапшырыуҙарҙа ҡатнашыусы ҡыҙҙар-егеттәр был фекерҙәрҙе инҡар итә килә. Китапханаларға йөрөүсе, төрлө әҙәби конкурстарҙа ҡатнашыусылар артҡандан-арта бара. Бөгөн беҙҙең студияға килеүселәр ҙә китап һөйөүселәр.Бөгөнгө ҡунаҡтар -  Әхмәтзәки Вәлиди исемендәге милли  китапхананың башҡорт әҙәбиәте һәм туған яҡты өйрәнеү бүлеге етәксеһе  Айгөл Сәлимйән ҡыҙы Буранғолова, Рәми Ғарипов исемендәге 1-се Башҡорт гимназия-интернатының иң күп китап уҡыусыларырының береһе Алина Ғүмәрова һәм "Күпер" тапшырыуының йәш хәбәрсеһе Лидиә...

08.02.2018

Рәми Ғарипов исемендәге 1-се Башҡорт республика гимназия-интернаты уҡыусылары һәр яҡлап та һәләтле һәм төрлө олимпиада-ярыштарҙа үҙҙәрен тик яҡшы яҡтан күрһәтә килә. Тап ошо уҡыу йортон тамамлаусылар оло тормошта ла юғалып ҡалмай. Улар белемле лә, һәләтле лә, әүҙем дә. Бөгөн беҙҙең студияла  гимназияның "Таңсулпан" драма түңәрәге етәксеһе Рима Фәиз ҡыҙы Нәбиева һәм түңәрәктә шөғөлләнеүсе ҡыҙҙар Алина Ғүмәрова менән Лидиә Динәхмәтова. (7 февраль тура эфирынан яҙма.)

01.02.2018

Йәштәребеҙ араһында юғары белемгә эйә булырға теләүселәр йылдан-йыл арта бара. Берәүҙәр Башҡортостан уҡыу йорттарын һайлаһа, икенселәр Рәсәйҙең башҡа ҡалаларына, хатта сит илгә барып уҡырға батырсылыҡ итә. Башҡортостандан ситтә уҡыусы студенттарҙың күбеһе әлеге мәлдә ҡышҡы ялда, тыуған төйәгендә ял итә. Форсаттан файҙаланып беҙ улар менән осрашып, аралашып ҡалыу ниәте менән тура эфир студияһына саҡырҙыҡ. Улар М.В.Ломоносов исемендәге Мәскәү  дәүләт университетының геология факультеты студенты Гүзәл Әлибаева һәм Санкт-Петербург политехник университеты магистратураһында белем эстәүсе Мәрйәм Вилданова.

25.01.2018

Чехия мәктәптәрендә "бер"ле алыу һәр уҡыусының теләге. Ә "биш"ле билдәһе иң насар өлгәшкәндәргә генә ҡуйыла икән. Финляндияла иһә, әгәр уҡыусы таҡтаға саҡырыуҙарын теләмәһә, унан һорамайҙар. Был илдә материалды белмәгән уҡыусынан уҡытыусы һорай ҡалһа, уны кәмһетә тип иҫәпләнә.  Норвегияла 8-се класҡа тиклем уҡыусыларға бөтөнләй билдә ҡуймайҙар. Ә беҙҙең студия ҡунаҡтары мәктәптә билдә ҡуйыуға нисек ҡарай? Уҡыу алдынғыһы Әғзәм Ниғмәтуллинды, уның әсәһе Айгөл Әхмәтшакир ҡыҙын һәм Лидиә Динмөхәммәтованы тыңлайыҡ. 

Страницы

тура ЭФИР

Online 128 КБитс/с

105.5 FM

Аудио ағым

әле эфирҙа


Һауа торошо (Өфө)

кис 19..21°C
төндә 13..15°C
иртән 14..16°C
көндөҙ 22..24°C
www.gismeteo.ru
Текста орфографик хата:
Хата тураһында хәбәр итеү өсөн “Хата тураһында хәбәр итегеҙ” төймәһенә баҫығыҙ. Шулай уҡ һеҙ хәбәргә комметарий өҫтәй алаһығыҙ.