Беҙҙең проекттар

22.02.2018

Ағиҙел Өфөнән төньяҡ-көнбайышҡа табан 250 км алыҫлыҡта, Ағиҙел йылғаһы буйында урынлашҡан. Республикабыҙҙағы иң йәш ҡалаларҙың береһе. Ул эшселәр ҡасабаһы булараҡ 1980 йылда төҙөлә башлай. 1991 йылда Ағиҙелгә ҡала статусы бирелә. Майҙаны — 53 кв. км. Ағиҙелдә 20 меңгә яҡын кеше йәшәй. Бында 17 милләт вәкиле дуҫ-татыу ғүмер итә. Башҡорт, татар, рус халҡы күпселекте тәшкил итә. Ағиҙелдәр араһында мари, удмурт, мордва, латыш, йәһүд, грузин, осетин һәм башҡа халыҡтар бар.

21.02.2018

Мәргән уҡсы ғәсҡәргә тиң тигән борон ата-бабаларыбыҙ. Башҡорт уҡсыларының даны беҙгә тарихтан яҡшы билдәле. Заманында "төньяҡ амурҙары" тигән исем ҡаҙанған яугирҙарҙың вариҫтары бөгөн традицион уҡтан атыуҙы тергеҙеү һәм популярлаштырыу буйынса байтаҡ эштәр алып бара. Республикала "Мәргән уҡсы" хәрәкәтен ойоштороусы, Республика халыҡ ижады үҙәгенең традицион, халыҡ уйындары буйынса әйҙәүсе белгесе Юлай Ғәлиуллин менән ошо хаҡта һөйләшәбеҙ.

20.02.2018

Донъяла ул бары берәү генә,
Башҡортостан кеүек берҙән-бер, 
Үҙ тауышы итеп йәшәү өргән 
Тамыр ебәргәндән тыуған ер. 

Милләтебеҙ ниндәй, ҡурай шундай: 
Тик тәбиғәт – барса булмышта, 
Ябай ғына, ә тылсымы сикһеҙ, 
Эскерһеҙ көй булып тулышһа. 

16.02.2018

Көньяҡ Кореяла олимпиада гөрләй. Төрлө бәхәстәр тыуҙырған, яндырған да, көйҙәргән дә, һөйөндөргән дә уйындарҙы ситтән күҙәтәбеҙ. Сәмле ярыштар Көньяҡ Азияла ғына түгел Башҡортостанда ла үтә. Беҙ уларҙы үҙебеҙсә, шаяртып “ауылпиада” тип атайбыҙ. Ҡышҡы уйындарҙа кемдәр ҡатнаша? Сәмле ярыштарҙа кемдәр еңә? Спорт менән дуҫ халыҡ ҡайҙа йәшәй?

15.02.2018

Сибай – республикала иң төҙөк һәм матур ҡалаларҙың береһе. Уны күптәр Урал аръяғының ысын баш ҡалаһы тип тә йөрөтә. Заманында ҡала баҡыр-цинк мәғдән ятҡылығын үҙләштереү маҡсатында төҙөлһә, бөгөн ул Көньяҡ Уралдың сәнәғәт, мәҙәниәт, сәнғәт, әҙәбиәт, мәғариф үҙәгенә әйләнде. Сибай ҡалаһының тарихы, матур урындары һәм әлбиттә шәп халҡы менән танышабыҙ.

14.02.2018

Мөхәббәт йыры – һәр кемгә таныш:

ул – йәнле ҡурған тетрәткес һағыш;

һүнмәҫкә ҡапҡан аяуһыҙ ялҡын...

Ә үҙе йәнгә, о, нисек, яҡын!

13.02.2018

Самауыр сәйенә билдәле режиссер-документалист, Рәсәй Кинематографистар союзы ағзаһы, бик күп халыҡ-ара, Рәсәй кинофестивалдәре һәм "Тэфи–регион 2007" конкурсы еңеүсеһе, Башҡортостандың атҡаҙанған сәнғәт эшмәкәре  Вилүрә Иҫәндәүләтова саҡырылған.

12.02.2018

“Барлыҡ йыуанысым шиғырҙарҙа,
Бар бәхетем халҡым телендә.
Халҡым ҡалһа, мин ҡалырмын,
Һүҙем йәшәр әле илемдә”,

Уның һүҙе ҡалды. Уның шиғырҙары үлемһеҙ. Уның ижады олоһона ла, кесеһенә лә яҡын. Башҡортостандың халыҡ шағиры Рәми Ғарипов үлемһеҙ әҫәрҙәре менән халҡыбыҙ күңелендә мәңгелеккә уйылып ҡалды. Ғүмере буйы илем, телем тип янып йәшәгән атаҡлы шағирыбыҙҙың тыуыуына – 86 йыл. 

09.02.2018

Башҡорт дебет шәле — биҙәү-ғәмәли сәнғәтенең бер тармағы. Был кәсеп бигерәк тә Әбйәлил, Баймаҡ, Белорет, Ейәнсура, Күгәрсен, Хәйбулла райондарында, Ырымбур өлкәһенең башҡорттар күпләп йәшәгән Һарыҡташ, Ҡыуандыҡ һәм Һаҡмар райондарында киң таралған. "Самауыр янынд" тап ошо шөғөлгә өҫтөнлөк биргәндәрҙе, шәл бәйләүселәрҙең оҫталығына таң ҡалғандарҙы саҡырҙыҡ.

08.02.2018

Октябрьский – ҙурлығы буйынса республика ҡалалары араһында бишенсе урында. Ул Өфөнән көнбайышҡа табан 185 километр алыҫлыҡта Ыҡ йылғаһы буйында урынлашҡан. Октябрьский ҡалаһының барлыҡҡа килеү тарихын 1944 йылда ошо ерҙә, Нарыштау итәгендә Девон нефте табылыуы менән бәйләйҙәр. Ошонда нефть ятҡылығы табылғас, ике йылдан күркәм ҡала төҙөлә башлай. Тап ошо осорҙан “Туймазынефть” идара­лығының табышы ике тапҡырға арта. Һис шикһеҙ, Октябрьский нефтенең Бөйөк Ватан һуғышында еңеп сығыуҙа, унан һуңғы йылдарҙағы үҫештә өлөшө ҙур.. Әле лә нефть компанияһы күберәк ошондай элекке ятҡылыҡ­тарға таянып эшләй, ышаныслы алға бара. Данлыҡлы 100-сө скважинаға һәйкәл ҡаланың үҙенсәлекле билдәһе.

07.02.2018

"Самауыр янында" милли биҙәүестәр тураһында һөйләшәбеҙ. Улар бөгөн яңырыш осорон кисерә. Боронғо өлгөләрҙе тергеҙеүсе оҫталар ҙа, уларҙы стилләштереп эшләүселәр ҙә бар. Ҡупшы биҙәүестәр заманса күлдәктәргә  айырым биҙәк өҫтәй. Ҡатын-ҡыҙҙарҙы тағы ла гүзәлерәк, күркәмерәк күрһәтә улар. ти ҡунаҡтарыбыҙ. 

06.02.2018

Был ҡыҙҙар кейәүгә сығырға хыяллана... Ышаныслы тормош юлдашы тураһында хыял итмәгән гүзәл зат аҙмы ней тиерһегеҙ. Әммә башҡаларҙан айырмалы, был һылыуҙар уй-теләктәре тураһында ҡысҡырып әйтеүҙән ҡурҡамай. Хыялға илткән юлда ниндәй хәл-ваҡиғалар солғанышында ҡалырға мөмкин? Ниҙәр булыуы ихтимал? Йырсылар Альбина Килдейәрова, Фәриҙә Ғаззалова һәм Гөлфинә Хәмитова ошо һорауҙарға тамашасылары менән бергә яуап эҙләмәксе. Моңло тауыштары, дәртле йырҙары менән бик күп тамашасыларҙы әсир иткән башҡарыусылар Ғашиҡтар көнөнә үҙенсәлекле сара әҙерләй. Ошо тамаша һәм йырсылар ижадындағы яңылыҡтар тураһында һөйләшәбеҙ.

05.02.2018

Ҡояш нуры менән бергә,
Өй эсенә шатлыҡ тулған.
Яулыҡ бирәм һөйөнсөгә -
Бөгөн ейәнсәрем тыуған!
Теләп алған сабый ҡайтты,
Бишек көтә уны түрҙә.
Артабан да буш тормаһын
Бәпес элгән ошо урҙа.

Тамара Теләүсина.

02.02.2018

Китап – әҙәм өсөн бер ғәжәйеп донъя,
Уның хаҡын белмәгәндәр уға суммай.
Сумдың икән ул донъяға – мәңге туймай
Йәшәрһең, ти, хистәрҙән һис айырылмай.

"Самауыр янында" китаптар тураһында һөйләшәбеҙ.

01.02.2018

Халыҡ риүәйәттәре, архив мәғлүмәттәре буйынса, Бәләбәй ауылына припущенник сыуаштар нигеҙ һала.  1781 йылда Бәләбәй өйәҙ ҡалаһына әүерелгән.Башҡ-н ерендәге башҡа ҡалалар кеүек, батша хакимиәтенең терәк пункты булған. Ҡала шулай уҡ Ырымбур губернаһының Бәләбәй өйәҙе үҙәге лә була. Бәләбәйҙең  Өфөгә, Ырымбурға, Ҡазанға, Белоретҡа  илтеүсе юлдар сатында — бик уңайлы ерҙә урынлашыуы уның уҫешенә ыңғай йоғонто яһаған. Шулай ҙа ҡала ифрат яй үҫкән. Иген үҫтереүҙән һәм мал аҫрауҙан тыш, ҡала халҡы урмансылыҡ кәсептәре менән дә шөғөлләнгән.

Хәҙерге Бәләбәй — Башҡортостандың индустриаль һәм мәҙәни үҙәктәренең береһе. Шкапов нефть ятҡылығы асылғандан һуң Бәләбәй нефтселәр ҡалаһы булып китһә, “Автонормаль” заводы төҙөлгәндән һуң уға машина эшләүселәр ҡалаһы тигән атама өҫтәлә.

...
31.01.2018

Башҡорт телен, мәҙәниәтен һәм халыҡ традицияларын үҫтереү йүнәлешендә эшләгән "Ҡурай" йыр-моң каналы "Ҡурай даны" премияһын иғлан итте. Ошо проект, шулай уҡ башҡа яңылыҡтар  тураһында һөйләшәбеҙ. 

30.01.2018

Йырсы ниндәй яңы йырҙар әҙерләй? Фәрүәз Урманшин менән уны нимәләр бәйләй? "Яңғыҙҙарҙы кем яратыр" йыры нисек ижад ителгән? Ул кемгә бағышланған? Башҡортостандың атҡаҙанған артисы Резидә Әминева ошо һәм башҡа һорауҙарға яуап бирә.

29.01.2018

Олатай, ҡартатай, ҡартай, ҙур бабай, дәүәтей, ҙур атай, ҙүрәтәй, дурбабай, ҡартәтей... Беҙ уларға наҙлап һәм яратып шулай тип өндәшәбеҙ. “Самауыр янында” олатайҙар тураһында һөйләштек.

26.01.2018

Беҙҙең халыҡта театр сәнғәтенә иғтибар ҙур. Театр – тамашасыларҙы берсә илатыусы, берсә шатландырыусы ғәжәйеп донъя тибеҙ. Спектаклдәрҙән берәүәр ғибрәт, икенселәр үрнәк ала. Көндәлек мәшәҡәттәрҙе бер аҙ ситкә ҡуйып, спектакль ҡарау, күптәргә оло кинәнес, ҡабатланмаҫ ял минуттары бүләк итә. Берәүҙәр спектаклдәргә тамаша ҡылһа, икенселәр шул тамашаларҙың уртаһында ҡайнай. Театр жанры беҙҙә әүҙем үҫешкән. Төшкө табын ҡунаҡтары - үҙешмәкәр артистар.

25.01.2018

Баймаҡ тарихҡа бик бай ҡала. Уға нигеҙ һалыныуға 270, ә ҡала статусы алыуға 80 йыл тула. Ҡасандыр Баймаҡ Бикбулатов атлы уҙаман үҙенең ғаиләһе менән ошо ергә нигеҙ һалған. Ул Бөрйән волосының старшинаһы һәм 1755 йылдарҙа Батырша етәкселегендәге ихтилалда әүҙем ҡатнашҡан батырҙарҙың береһе булған. Баймаҡ старшина нигеҙ һалған ерҙәрҙә бөгөн кемдәр йәшәй? Тыуған ҡалалары тураһында улар нимә белә?

Страницы

тура ЭФИР

Online 128 КБитс/с

105.5 FM

Аудио ағым

әле эфирҙа


Һауа торошо (Өфө)

кис -15..-17°C
төндә -19..-21°C
иртән -21..-23°C
көндөҙ -11..-13°C
www.gismeteo.ru
Текста орфографик хата:
Хата тураһында хәбәр итеү өсөн “Хата тураһында хәбәр итегеҙ” төймәһенә баҫығыҙ. Шулай уҡ һеҙ хәбәргә комметарий өҫтәй алаһығыҙ.