Беҙҙең проекттар

01.07.2017

   “Компьютер һинең холҡоңа һәм ҡиәфәтеңә лә битараф. Шулай ҙа ул ҡыҙыҡһыныусан, тәүәккәл һәм ныҡыштарҙы үҙ итә”, - ти 6 йыл ситтән тороп эшләүсе  “Йәшәү йәме” геройы, веб-дизайнер Даян Ғәйетбаев. Интернет аша аҡса эшләү ысулдарын нисек табырға? Үҙ ваҡытыңды ҡәҙерләү, уңышлы булыу, үҙеңде үҫтереү – ошо йүнәлештә булыр әңгәмәбеҙ.

24.06.2017

Ул "Яуһын әйҙә ҡарҙары" тигән йыры менән танылыу ала. Йыр тамашасыға тәҡдим ителгән йылды Баймаҡ районында бик күп итеп ҡар яуа. Шуға ла Баймаҡ ҡалаһының Сәнғәт мәктәбе уҡытыусыһы, баянсы, үҙешмәкәр композитор ХәлилБиктимеров тураһында яҡташтары "йыры менән ҡарҙар яуҙырған ижадсы" тип шаяртып ала. Әммә төбәктә ул тәү сиратта оҫта баянсы, ихлас, халыҡсан йырҙар авторы булараҡ танылған. Моңло замандашыбыҙ - “Йәшәү йәме” тапшырыуының геройы.

17.06.2017

Рәссам Сәлимә Усманованың эштәрен зәңгәр экрандарҙан йыш күрергә мөмкин. Ул биҙәгән тапшырыуҙар көн дә “Тамыр”  балалар телерадиоканалында күрһәтелә. “Борсаҡ”, “Тау-тау хәбәр”, “Бауырһаҡ”, “Шәп арба”,  “ӘЮЯ ҡаласығы” – был тапшырыуҙарҙы биҙәү эшендә ул ҙур ихласлыҡ менән ҡатнашҡан. Йәш замандашыбыҙ халҡыбыҙҙың этнографияһы менән дә ҡыҙыҡһына. Уның эҙләнеү өлкәһе - милли кейемдәр.

10.06.2017

      Сабыйын тәү тапҡыр күкрәгенә ҡыҫҡан әсәнән дә бәхетлерәк, бала һөйөүенә төрөнөп йәшәгән атайҙан да ғорурыраҡ кеше, шат ауаздарға күмелгән йорттан да яҡтыраҡ, йылыраҡ мөхит бармы икән?! Һәр яҡлап тырыш,  тормош ауырлыҡтарына бирешмәй, ғаиләһен бөтөн, бәхетле, мөхәббәтле ҡороу өсөн күңел ҡеүәтен һалып йәшәгән  ғаиләләрҙең береһе - Өфө ҡалаһынан биш бала тәрбиәләүсе Гөлсинә һәм Рөстәм Әхмәтшиндар булыр.

03.06.2017

Юлай Вәли улы Солтанбаев оҙаҡ йылдар Ейәнсура районы Үрген ауылында уҡыта. Мәктәп директоры була. "Атайым менән әсәйемдең һәм үҙемдең директорлыҡ стажы ярты быуат менән иҫәпләнә. Ә ғаиләбеҙҙең дөйөм педагогик стажы 250 йыл", - ти Юлай Вәли улы. Ул балаларға математика, алгебра, геометрия серҙәрен аса. Тарих менән дә ҡыҙыҡһына. 

20.05.2017

   Яңы тыуған сабый тауышынан да һөйөнөслө яңылыҡ бармы?! Ғаиләләге иң ҡыуаныслы, мөғжизәле минуттар – ул бәпес тыуыу. Бала табыу йорто - ғаиләне бәхетле итеүсе, яуаплы, ата-әсә бурысын йөкмәтеп, бөгөнгө менән киләсәкте тоташтырыусы бер күпер. Ә әсә булыу бәхетен тойорға ярҙам иткән,  аҡ халатлы шәфҡәт туташтары фәрештәләй күренә, ҡәҙерле, туғандай яҡын да кеүек. Сөнки көтөп алған сабыйыңды тәүге тапҡыр улар ала, имен-һау донъяға килеүен күреп ҡыуана, шатлығыңды уртаҡлаша. “Күпме сабыйҙы яҡты донъяға ҡабул иттем”, - ти бөгөнгө тапшырыу геройы, 30 йылдан ашыу акушер булып эшләгән  Мәүлиә Шәфиғуллина.

06.05.2017

    Тапшырыу геройының фекере – тормошта уңышлы, бәхетле булыу өсөн үҙеңде, йәшәү рәүешеңде үҙгәртергә кәрәк.  Һынауҙарҙың иң ауыры – үҙ-үҙеңде еңеү ул. Ә нисек? Әңгәмәбеҙ ошо хаҡта.

22.04.2017

Изгелек – ҡояш нурына тиң, тиҙәр. Бер-береңә ярҙам итеп йәшәү, асыҡ йөҙлө, тәмле телле булыу кешеләргә ҡояштың яҡты нурҙары кеүек бик тә кәрәк. Ана шул яҡтылыҡҡа күмгән, оло йөрәкле, мәрхәмәтле, шәфҡәтле, изге йөрәкле кешеләр яныбыҙҙа байтаҡ. Беҙ һеҙҙе тап шундай замандаштарыбыҙҙың береһе - Өфө ҡалаһынан Гөлгөнә Рыҫҡолова менән таныштырабыҙ.

15.04.2017

     “Ғүмер миҙгеленең һылыуы” исеменә лайыҡ бөгөнгө геройыбыҙ Жанна Йомадил ҡыҙы Солтанова. Ул сығышы  менән – Салауат районы Мөрсәлим ауылынан. Һәр нәмәнең үҙ ваҡыты икәнен аңлап, йәшәүҙең ҡәҙерен белгәнгәме ҡартлығы ла бәхетле, күркәм. Әүҙем йәмәғәтсе, мәғариф ветераны, Өфө районы Дим биҫтәһенең ағинәйҙәр ҡоро ағзаһы, тынғыһыҙ холоҡло, һис зарлана белмәҫ әңгәмәсем менән тормош,  ғүмер асылы хаҡында һөйләшербеҙ.

07.04.2017

“Бөтә һөнәрҙәр ҙә – кешенән, өс шөғөл генә Хоҙайҙан, – тигән бер философ. – Уҡытыу, дауалау һәм хөкөм итеү”. “Ана шул Аллаһ тарафынан бирелгән һөнәрҙәрҙең береһенә эйә булыуым менән сикһеҙ бәхетлемен”, - ти бар ғүмерен йәш быуынды тәрбиәләүгә арнаған хөрмәтле ветеран-уҡытыусы Зәһүрә Байтурина. 

25.03.2017

     Республикабыҙҙа ғаилә нигеҙенең ныҡлығын булдырыу йәһәтенән төрлө саралар ойошторола. 1 мартты Бөтә донъя башҡорттары ҡоролтайы Башҡарма комитеты Башҡорт ғаиләһе көнө тип билдәләргә тәҡдим итте. Ошо милли байрамда беҙ бер-береһенә терәк булып, гөрләтеп донъя көтөүсе  Силәбе өлкәһе Сосновка районы Мамай ауылынан Тәнзилә һәм Илшат Мажикаевтар   менән осраштыҡ та инде. "Йәшәү йәме" сығарылышында был күркәм ғаилә менән яҡындан танышырбыҙ. 

17.03.2017

“3D форматындағы” тип йөрөтөлгән рәсемдәр һуңғы арала бик киң билдәлелек яулай. Социаль селтәрҙәрҙә бындай һүрттәр меңәрләгән “лайыҡ” билдәһе, йәғни лайктар йыя. Интернет ҡулланыуылар был рәсемдәрҙе дуҫтары менән уртаҡлашҡанда, ғәҙәттә, “Бына мотлаҡ күрергә кәрәк!” тигән яҙыу менән оҙата. Ә бына Баймаҡ районы Темәс ауылында йәшәүселәргә лайктар ҙа ҡуйырға кәрәкмәй. Улар тылсымлы һүрәттәрҙе тотоп ҡарай ала. Күләмле рәсемдәрҙе уларҙың ауылдашы Марат Ғафаров төшөрә. Рәсәйҙә генә түгел, сит илдә лә үҙенең рәсемдәре менән танылыу алған оҫта рәссам – “Йәшәү йәме” тапшырыуы геройы.

11.03.2017

      Фирүзә Абдуллина исеме шиғриәт һөйөүселәргә күптән таныш. Ауыл уҡытыусыһы хеҙмәтенә мөкиббән киткән һәм шиғри ижад артылыштарына ынтылған зыялы. Ике йүнәлеш бер-береһен күтәрә, үҫтерә. Ул шиғырҙарын интернетҡа ҡуя башлау менән күптәрҙең күңел серҙәшенә әйләнә. Фирүзә апайҙың   шиғриәте матурлыҡ донъяһына яҡыныраҡ килергә ярҙам итә, кешеләрҙе рухландыра.Тормошто яратырға өндәгән шиғриәте менән Фирүзә апай Абдуллина йәмләр  “Йәшәү йәме” сығарылышын. Әңгәмәбеҙ ижад, тормош, йәшәү хаҡында булыр.

 

 

 

23.02.2017

Фәнил Гәрәев Туймазы районының Собханғол ауылынан. Мөкәрәмә һәм Арыҫлан Гәрәевтар ғаиләһендәге бишенсе бала 1936 йылда донъяға ауаз һала. Уның бала сағы ауыр һуғыш йылдарына тура килә. Аталары фронтҡа киткәндә Фәнилгә ни бары 5 кенә йәш була. Һуғыш йылдары малайҙы нығыта. Изгелек, тормошто яратыу, эш һөйөүсәнлек, намыҫ кеүек тәүге дәрестәрҙе ул ошо осорҙа үҙләштерә. Тап ошо сифаттар уға киләсәктә офицер булырға ярҙам итәсәк тә инде. Әйткәндәй, әрмелә хеҙмәт итеү, хәрби офицер булыу - Фәнил Арыҫлан улының бала саҡ хыялы. Һуғыш мәшһәрен иҫән-имен үтеп ҡайтҡан атаһына, уның янына килеп йөрөгән фронтовик ағайҙарға оҡшарға тырыша ул.

11.02.2017

    Ҡатын-ҡыҙ өсөн барынан иң ҙур бәхет – Әсә булыу. Бала – йәшәү йәме, ҡото. Уның кем булып үҫеүе, киләсәктә ниндәй юлды тормош һуҡмағы итеп һайлауы тәрбиәгә бәйле.  Ғаилә - баланың холоҡ фиғелен булдырыусы, унан ысын кеше яһаусы иң мөһим тормош мәктәбе.  “Йәшәү йәме” сығарылышында илебеҙгә лайыҡлы ир-егеттәр тәрбиәләүсе әсә, уңған ҡатын-ҡыҙ Зәбирә Әпсәләмова менән ғаилә ныҡлығының нигеҙе, ир баланы тәрбиәләү алымдары тураһында һөйләшәбеҙ. 

04.02.2017

Күрше Силәбелә төпләнгән яҡташыбыҙ Ҡамса Мортазинды күптәр яҙыусы, ғалим,  журналист, йәмәғәт эшмәкәре булараҡ яҡшы белә. Әммә Ҡамса Дәүләтбай улы тәү сиратта үҙен “уҡытыусымын” ти. Ул үҙ эшенә мөккибән китеп, яратып башҡара. Төп эшенән тыш әҙәби ойошма эшмәкәрлеген алып барырға ла, төрлө осрашыу, саралар, сәйәхәттәр  ойошторорға ла, ғилми эштәр һәм береһенән-береһе матур, уҡымлы әҙәби әҫәрҙәр ижад итергә һәм тағы ла әллә күпме эштәр эшләргә өлгөрә ул.

21.01.2017

    Ғаилә –  йәшәү башланғысы, мөхәббәт һәм ихтирам сығанағы. Әҙәм балаһы ғаиләлә йәшәү көсө бирерлек йылы усаҡ, һыйыныр тыныс урын таба. Һәр ҡайһыбыҙ ер йөҙөнә яратырға, яратылырға, донъя ҡорорға, бәхетле булырға килгән. "Матур ғаилә - ил күрке", - тиелә халыҡ мәҡәлендә.  Һоҡланғыс, татыу ғаиләләр тормошто биҙәй.  Шуларҙың береһе,  Учалы ҡалаһында йәшәүсе йәш ғаилә Гөлфинә һәм Айсар Йомағужиндар менән “Йәшәү йәме” сығарылышында танышырбыҙ. 

05.01.2017

Лиза Әғәҙуллина үҙенең бар ғүмерен балаларға белем һәм тәрбиә биреүгә бағышлай. Исеме ил кимәлендә билдәле химия уҡытыусыһының хеҙмәте иң беренселәрҙән булып Башҡортостандың халыҡ уҡытыусыһы тигән исем менән билдәләнә. 2016 йыл аҙағында рәсәй Президенты Владимир Путин Лиза Әғәҙуллинаға Рәсәйҙең халыҡ уҡытыусыһы тигән маҡтаулы исем бирелеү тураһындағы Указға ҡул ҡуя. Абруйлы педагогтың бөтә теләге - уҡытыусы абруйын күтәреү. Уның 75 йәшлек юбилейы уңайынан осрашыу тәҡдим итәбеҙ.

31.12.2016

   Яңы йыл алдынан кем генә мөғжизәгә ышанмай икән?! Бигерәк тә балалар Ҡыш бабай менән Ҡарһылыуҙы йыл буйы түҙемһеҙлек менән көтөп ала. Сабыйҙарҙың матур, изге теләктәрен тормошҡа ашырыу йәһәтенән йыл һайын “Юлдаш” радиоһы “Күңел йылыһы” исемле мәрхәмәтлек акцияһы сиктәрендә балалар приютында тәрбиәләнеүселәргә байрам ойоштора. Быйыл сатлама һыуыҡ көндәр булыуға ҡарамҫтан,  күркәм йолаға тоғро ҡалып, радио коллективы Нуриман районы Ишморат ауылындағы балалар приютына юлланды. “Йәшәү йәме” тапшырыуының Яңы йыл сығарылышы ошо сағыу тамашанан булыр. 

17.12.2016

Өфө ҡалаһынан Сайма Хәсәнованы күптәр дизайнер-модельер булараҡ белә. Ул теккән зауыҡлы, ҡупшы кейемдәрҙе төрлө өлкәлә эшләгән ханымдар ҙа, ир-уҙамандар ҙа, сәхнә кешеләре лә яратып кейә.

Страницы

тура ЭФИР

Online 128 КБитс/с

105.5 FM

Аудио ағым

әле эфирҙа


Һауа торошо (Өфө)

төндә 12..14°C
иртән 13..15°C
көндөҙ 22..24°C
кис 19..21°C
www.gismeteo.ru
Текста орфографик хата:
Хата тураһында хәбәр итеү өсөн “Хата тураһында хәбәр итегеҙ” төймәһенә баҫығыҙ. Шулай уҡ һеҙ хәбәргә комметарий өҫтәй алаһығыҙ.