Яңылыҡтар

16:40 - 22.01.2018

Рәсәй һаулыҡ һаҡлау министрлығының яңы фарманы донъя күрҙе. Уға ярашлы, кешеләр анализ һөҙөмтәләрен интернет аша аласаҡ. Был функция дәүләт хеҙмәттәре порталы аша башҡарыласаҡ. Мәҫәлән, пациент ауылда йәшәй, ә Өфөлә дауаланған. Ул тейешле белешмәләрҙе интернеттан ғына аласаҡ. Әйткәндәй, президент Владимир Путин телемедицина тураһында ҡанунға ла ҡул ҡуйғайны. Уға ярашлы, теләгән табиптан консультацияны онлайн тәртиптә алып була. Ә 2019 йылдан препараттарға электрон рецепттар рөхсәт ителәсәк.

ҡаралған: 14
16:01 - 22.01.2018

Өфө планетарийын үҙгәртәләр. Реконструкция быйыл башланыр, тип көтөлә. Поректы әҙер, унан күренеүенсә, бина 10 ҡатлы буласаҡ, күпләп офистар урынлаша. Космонавтика музейы, аэрокүнекмәләр залы, туҡланыу нөктәләре лә ҡаралған. Өфө планетарийы Мәжит Ғафури паркы янында 1964 йылда асыла, йылына 50 меңләп кешене ҡабул итә. Башлыса уҡыусылар йөрөй.

ҡаралған: 14
15:21 - 22.01.2018

Британия ғалимдары йәш төркөмдәрен ҡайтанан ҡарап сығырға саҡыра. Мәҫәлән, 10 йәштән 24-кә тиклемгеләрҙең барыһын да үҫмерҙәр категорияһына индереү башланғысын күтәрәләр. Сөнки кеше был ваҡытта даими үҫә. Аҡыл теше лә 24-25-тә генә сыға. Икенсе яҡтан, ошо йәшкә тиклем уларҙың күбеһе үҙаллы тормош башламай, ата-әсәһенә ҡарап тора. 25-44 йәшлектәр – йәш, 45-59 йәштәгеләр урта йәштәге иҫәпләнәсәк. 60-тан өҫтәгеләр – оло йәштәге, 90-ды уҙғандар йөҙйәшәрҙәр категорияһына ҡарай.

ҡаралған: 17
14:40 - 22.01.2018

Башҡортостанда "Мәктәп урмансылығы" конкурсына йомғаҡ яһалды. Унда төрлө район-ҡалаларҙан 30 мәктәп вәкилдәре ҡатнашты. Иң яҡшыһы тип Баймаҡ районы Йомаш мәктәбенең “Ҡайынҡай” урмансылығы иғлан ителде. Ошо уҡ атамалы, тик Илеш районы Исәмәт мәктәбе урмансылығы - 2-се, Стәрлетамаҡ ҡалаһынан “Миләш” урмансылары 3-сө булды. Шулай уҡ Әбйәлил, Благовещенск Бөрйәндең йәш урмансылары тәбиғәтте һаҡлау йәһәтенән яҡшы эштәр тәҡдим иткән.

ҡаралған: 12
14:02 - 22.01.2018

Транспорт министрлығы Бюджет кодексына үҙгәрештәр тәҡдим итте, ул хөкүмәттә бөгөн тикшерелә. Уға ярашлы, юл ҡағиҙәләрен боҙған өсөн штрафтар ил төбәктәренең Юл фондтарына күсереләсәк. Йәғни, был аҡсаны фәҡәт юлдарға ғына тотонорға мөмкин буласаҡ. Әлегә төбәктәр штраф суммаһын башҡа маҡсаттарҙа ла ҡуллана ала. Яңылыҡ 2019 йыл башынан ғәмәлгә инер тип көтөлә.

ҡаралған: 53
13:19 - 22.01.2018

“Өфө” туристик-рекрацион кластер проекты тикшерелә. Республиканың “Эске һәм тышҡы туризмды үҫтереү” программаһы сиктәрендә Эшҡыуарлыҡ һәм туризм буйынса дәүләт комитеты концепция әҙерләгәйне. Әлегә “Бөрйән”, “Урал легендалары” кластерҙары ғәмәлгә ашырыла башланы. Йәнә 6 туристик-рекреацион зона өҫтөндә эш бара. Шул иҫәптән Өфө ҡалаһының да туризмды үҫтереү проекты әҙерләнә. Уның өҫтөндә Өфө дәүләт нефть-техник университетының Иҡтисад һәм сервис институты эшләй.

ҡаралған: 13
12:39 - 22.01.2018

Кушнаренко районында нефть үткәргесте ремонтлайҙар. 20 ғинуар төндә торба тишелеп, ергә нефть аға. Экологтар хәбәр итеүенсә, ул Ағиҙелдең ҡушылдығы булған Көҙөлшө йылғаһына эләккән. Боҙ аҫтында 400 метрға тарала. Йыйып алыу өсөн 13 урында бондар ҡуйғандар. Бысранған боҙ, ҡар һәм тупраҡты махсус полигонға ташыйҙар. Халыҡ Көҙөлшөнән һыу эсмәй, ә башҡа эсәр һыу сығанаҡтары бысранмаған.

ҡаралған: 14
12:00 - 22.01.2018

Синоптиктар мәғлүмәттәренә ҡарағанда, республика биләмәләрендә бөгөн бурандар башлана, елдең тиҙлеге секундына 15-20 метрғаса етәсәк. Шул уҡ ваҡытта артыҡ һалҡындар көтөлмәй, фәҡәт таулы райондарҙа 28-гә тиклем төшөүе фаразлана. Бындай һауа торошо 2-3 көн дауам итәсәк. Шуға водителдәргә артыҡ мөһим булмағанда алыҫ юлға сыҡмай торорға, йәйәүлеләргә лә иғтибарлы булырға кәңәш ителә.

ҡаралған: 19
11:21 - 22.01.2018

Рәсәй халҡы май байрамдарын көтә. Иң түбән хеҙмәт хаҡы беренсе майҙан күтәреләсәк. һөҙөмтәлә, минималь эш хаҡы 11 мең 163 һумға етә һәм йәшәү минимумына тиңләшә. Башҡортостанда иһә 15 процентлыҡ Урал коэффицентын да ҡушҡанда 12 мең 837 һумға етә. Йәғни, эш биреүсе хеҙмәткәргә ошонан да кәмерәк эш хаҡы түләргә тейеш түгел. Әле республикала минималь эш хаҡы - 10 мең 912 һум.

ҡаралған: 17
10:37 - 22.01.2018

Бөрө ҡалаһында "Керәшен һыуыҡтары" төбәк-ара эстрада йырҙары фестиваль-конкурсы уҙҙы. Гала-концертта Гран-при хужалары иғлан ителде. "Эстрада бейеүе" номинацияһында - Бөрө ҡалаһының "Маски" ансамбле, "Эстрада йыры" буйынса - Стәрлетамаҡтан Алина Рай, "Эстрада музыкаһы" номинацияһында Бөрөнән "Ред Хорс" төркөмө еңеү яуланы. Быйылғы фестивалдә беҙҙең республиканан 17 район һәм 13 ҡалаһы, Мәскәү, Һамар һәм Пермь крайы вәкилдәре ҡатнашты. Фестиваль-конкурс сиктәрендә эстрада вокалы буйынса республика семинары эшләне.

ҡаралған: 11
09:19 - 22.01.2018

Был аҙнала Башҡорт дәүләт университетының Стәрлетамаҡ филиалында робототехника буйынса республика ярыштары үтә. Ойоштороусылар хәбәр итеүенсә, унда 7-17 йәшлек балалар һәм үҫмерҙәр – 300 ләп конкурсант ҡатнашасаҡ. "Робофест"ҡа киләсәктә инженер һөнәре һайларға теләгәндәр, яңы төр техника уйлап табырға яратыусылар йыйыла.

ҡаралған: 26
08:49 - 22.01.2018

Бөгөн Өфөлә Волга буйы федераль округы төбәктәренән социаль өлкә белгестәре кәңәшмәһе башлана. Форум “Киләсәк” исеме аҫтында үтә, уның төп маҡсаты – социаль өлкәне камиллаштырыу, уға бизнесты йәлеп итеү, социаль яҡлау һәм хеҙмәтләндереү, социаль эшҡыуарлыҡ буйынса ҡанундар базаһын тәртипкә килтереү. Бындай форум барлыҡ федераль округтарҙа ла үтә. Ә Бөтә Рәсәй йомғаҡлау ултырышы 1-2 мартта Мәскәүҙә уҙғарыласаҡ.

ҡаралған: 12
08:00 - 22.01.2018

“Өфө” футболсылары бөгөн 2018 йылдағы тәүге уйынын уҙғара. Команда был көндәрҙә Кипрҙа, чемпионаттың яҙғы этабына әҙерләнә. Уның барышында бер нисә контроль уйын планлаштырылған. Өфө футболсылары бөгөн урындағы “Алки” менән осраша. Күнекмәләр барышындағы контроль уйын буйынса партнерҙар исемлегендә шулай уҡ Польшанан “Висла”, Чехиянан “Слован”, Словакиянан “Нитра”, Латвиянан “Лиепия” һәм Сербиянан “Чукарички” бар.

ҡаралған: 10
08:00 - 22.01.2018

Өфөлә “Экологик ғәҙәттәр марафоны” старт алды. Акцияла ҡатнашыусылар тәбиғәтте һаҡлау хаҡына үҙҙәренең ғәҙәттәрен үҙгәртергә тейеш. Мәҫәлән, электрҙы кәрәкһеҙгә сарыф итеүҙән туҡтау, һыуҙы һаҡсыл ҡулланыуға күсеү, бер тапҡыр ҡулланыла торған һауыт-һабанан баш тартыу, сүп-сарҙы контейнерҙарға сорттарға бүлеп һалыу – ошо эштәрҙе фото йәки видеоға төшөрөп барырға тейештәр. Ҡатнашыусыларға көн дә бер яңы бурыс бирелә. Экологик марафон өсөн социаль сайттарҙы файҙаланалар.

ҡаралған: 10
07:30 - 22.01.2018

Бөгөн республикала һәм Өфөлә көндөң аяҙлы-болотло булыуы, урыны менән бер аҙ ҡар яуыуы, еңелсә буран сығыуы көтөлә. Ел көнсығыштан һәм көньяҡ-көнсығыштан, талғын, ваҡыты менән көсәйеүсән.
Һауа температураһының республикала көндөҙ 7-12, Өфөлә 8-10 градус һалҡын булыуы күҙаллана.

ҡаралған: 12
07:00 - 22.01.2018

Республика хөкүмәтенең ошо турала күрһәтмәһе бар. Ҡаргиҙәрҙәрҙе техник тикшереү бөгөндән башланып, бер ай дауам итәсәк. Уның барышында мототранспорт менән файҙаланғанда ҡағиҙә боҙоуҙарҙы иҫкәртеү саралары үткәрелә. Операцияны үҙ йөрөшлө машиналар һәм башҡа төр техника торошон күҙәтеү буйынса Дәүләт инспекцияһы координациялаясаҡ. Ҡаргиҙәрҙә йөрөү өсөн тракторсы, йәки А-1 таныҡлығы кәрәк. Техниканы теркәмәгән өсөн штраф та ҡаралған.

ҡаралған: 22
18:18 - 21.01.2018

Башҡортостанда етемдәрҙе уллыҡҡа алыусы ғаиләләр арта бара. Республиканың Юстиция эштәре буйынса дәүләт комитетынан хәбәр итеүҙәренсә, былтыр 480 бала ата-әсәле булған. Был 2016-сы йылға ҡарағанда 42 балаға күберәк. Уллыҡҡа алыусыларҙың күбеһе ҙур ҡалаларҙа йәшәй. Мәҫәлән, Өфөлә уҙған йыл - 90, Стәрлетамаҡта - 24 һәм Күмертауҙа 20 бала ғаиләләргә алынған.

ҡаралған: 17
17:20 - 21.01.2018

Полиция хеҙмәткәрҙәре законһыҙ спирт етештереүсене фашланы. Башҡортостан буйынса Эске эштәр министрлығының иҡтисади хәүефһеҙлек һәм коррупцияға ҡаршы көрәш идаралығынан ошо турала хәбәр итәләр. Ҡырмыҫҡалы районында 48 йәшлек ир этил спирты етештереү менән кәсеп иткән. Уның хатта сифат лабораторияһы ла булған, әммә лицензияһы юҡ. Келәтендә полиция хеҙмәткәрҙәре 100 мең литр спирт тапҡан. Контрафакт продукцияның хаҡы 5 миллион һум тирәһе. Тикшереү барышында асыҡланыуынса, был предприятие 2013 йылдан алып эшләп килгән.

ҡаралған: 19
16:44 - 21.01.2018

Мәшғүллек хеҙмәте мәғлүмәттәре буйынса, Өфөнөң 72 предприятиеһы һәм ойошмаһы 296 хеҙмәткәрен ҡыҫҡартырға мәжбүр булған. Хеҙмәт урындарын ҡалдырырға тура киләсәк хеҙмәткәрҙәрҙең дөйөм һаны иһә әле 1 мең 876 кеше. Эштәренән бушатылғандарҙың 130-ы яңы хеҙмәт урыны тапҡан. Улар үҙ предприятиеларында башҡа эштәргә алынған.

ҡаралған: 16
16:00 - 21.01.2018

Республикала кер йыуыу порошоктарының сифаты баһалана. Рәсәй сифат хеҙмәте магазиндарҙа һатылған көнкүреш химияһы тауарҙарын тикшерергә йыйына. Исемлектә үҙебеҙҙә һәм сит илдә етештерелгән утыҙҙан ашыу бренд күрһәтелгән. Кер йыйыу порошоктары бер нисә төбәктә һайлап алына һәм лабораторияларҙа анализ үткәрелә. Контроль һатып алыуҙар Башҡортостандан тыш, Мәскәүҙә, Татарстанда, Тула өлкәһенда алып барыла. Һөҙөмтәләр бер нисә айҙан иғлан ителергә тейеш.

ҡаралған: 20

Страницы

тура ЭФИР

Online 128 КБитс/с

105.5 FM

Аудио ағым

әле эфирҙа


Һауа торошо (Өфө)

көндөҙ -10..-12°C
кис -10..-12°C
төндә -11..-13°C
иртән -11..-13°C
www.gismeteo.ru
Текста орфографик хата:
Хата тураһында хәбәр итеү өсөн “Хата тураһында хәбәр итегеҙ” төймәһенә баҫығыҙ. Шулай уҡ һеҙ хәбәргә комметарий өҫтәй алаһығыҙ.