Яңылыҡтар

15:23 - 09.07.2018

Киләһе йылда Эске тулайым продукттың 1,8 процентҡа артыуы фаразлана. Финанс министрлығынан белдереүҙәренсә, НДС-тың 20 процентҡа тиклем күтәрелеүе, нефть һәм газ һатыуҙан килем федераль ҡаҙна табышын арттырыу мөмкинлеген бирә. Әйткәндәй, киләһе йылда ил президентының май указын үтәүгә 1 триллион 170 миллиард һум йүнәлтелә. Артабан, был сумма йыл һайын арта барасаҡ.

ҡаралған: 20
14:11 - 09.07.2018

Башҡортостанда уҙған ял көндәрендә 20 янғын теркәлгән. 1 кеше үлгән, 4 кеше йәрәхәтләнгән. Кеше үлеменә килтергән хәл Шаран районында теркәлгән. Йомаҙыбаш ауылында ағас йорт янған. 72 йәшлек ирҙең ғүмере өҙөлгән. Ут сығыу күбеһенсә кешеләрҙең иғтибарһыҙлығына, вайымһыҙлығына бәйле, ти Ғәҙәттән тыш хәлдәр министрлығы эксперттары.

ҡаралған: 22
13:20 - 09.07.2018

Иртәгә, 10 июлдә, Республикала һәм Өфөлә көндөң аяҙлы-болотло булыуы, урыны менән күк күкрәп ямғыр яуыуы көтөлә, көньяҡ-көнсығышта яуым-төшөмһөҙ. Ел көньяҡ-көнбайыштан һәм көнбайыштан талғын, йәшен ваҡытында көсәйеүсән. Һауа температураһының республикала төндә +12, +17, көндөҙ +23, +28, Өфөлә төндә +14, +16, көндөҙ +24, +26 градус йылы булыуы күҙаллана. Алдағы ике көндә һауа торошонда үҙгәрештәр көтөлмәй.

ҡаралған: 23
12:35 - 09.07.2018

Республикала “Өлгө ал” тип аталған акция иғлан ителде. Кисә Ғаилә, тоғролоҡ һәм мөхәббәт көнөндә уға старт бирелде. Конкурста ҡала йәки райондың йәмәғәт тормошонда, коммерцияға ҡарамаған ойошмалар эшендә, ирекмәндәр хәрәкәтендә әүҙем ҡатнашҡан ғаиләләр ҡатнаша ала. Уларға видеояҙма төшөрөргә һәм уны социаль селтәрҙәргә һалырға кәрәк. Эштәр 9 сентябргәсә ҡабул ителә. Еңеүселәр интернетта тауыш биреү һәм махсус комиссия ҡарары буйынса асыҡлана. Иң әүҙем ғаиләгә Республика башлығы исеменән автомобиль һатып алыу өсөн 600 мең һумлыҡ сертификат бүләк...

ҡаралған: 27
12:15 - 09.07.2018

Өфөлә иҫерек ир етәксеһенең машинаһын ҡыуып алып киткән һәм бер нисә авария эшләгән. Ваҡиға уҙған шәмбе булған. "Ауди" машинаһында йөрөгән иҫерек ирҙе полиция туҡтатырға маташҡан, һуңынан артынан ҡыуа башлаған. Автомобилде туҡтатҡансы ул 4 машинаны бәрҙереп өлгөргән. Иҫерек водитель ҡулға алынған, енәйәт кодексы буйынса яуап тота.

ҡаралған: 27
11:33 - 09.07.2018

Рәсәй волейболсылары “Милләттәр лигаһы”нда еңеү яуланы. Турнир ошо көндәрҙә Францияла үтте. Волейболда “Милләттәр лигаһы” быйыл беренсе тапҡыр ойошторолдо. Быға тиклем донъя лигаһы ярыштары уҙғарылып килә инә. Финалда Рәсәй егеттәре Францияны 3-0 иҫәбенә еңде һәм төп трофейҙы яуланы. Милли команда составында Өфөнөң “Урал”ынан Алексей Кабешов, Дмитрий Ковалев һәм Игорь Филиппов сығыш яһаны. Әйткәндәй, “Милләттәр лигаһы”ның һайлап алыу турҙарының береһе быйыл июндә Өфөлә үтте. Беҙгә Ҡытай, Иран һәм Бразилия уйынсылары килде.

ҡаралған: 22
11:18 - 09.07.2018

Башҡортостан кешеләрен "Һабантуй-Терратуй"ға саҡыралар. Йәйге фестиваль был шәмбе Кушнаренко районы "Первушино" аэродромында була. Уның барышында ҡаршылыҡтар аша йүгереү буйынса ярыш та ойошторола. Ошонда уҡ Башҡортостанда эшләп сығарылған яңы үтә еңел самолетты күрергә була. Уға "Альтаир" тигән исем бирелгән. Балалар өсөн дә төрлө уйын-конкурстар әҙерләнә, тип хәбәр итә фестивалде ойоштороусылар.

ҡаралған: 25
10:47 - 09.07.2018

Һоро-көрән күбәләктәр айырыусы кисен, төндә әүҙемләшә, ут яҡтыһына күпләп килә. Фатирҙарға үтеп инеүе тураһында хәбәрҙәр бар. Эксперттар әйтеүенсә, был күбәләктәр кеше өсөн хәүефһеҙ, әммә ҡарышлауыҡтары ағастарҙың япраҡтарын ашай, ҙур зыян килтерә. Йәй башы һалҡын булғас, ҡарышлауыҡтар бер юлы күбәләктәргә әүерелгән, шуға күп һымаҡ тойола. Күгәүендәр, себендәр менән дә ошондай уҡ хәл күҙәтелә, ти белгестәр.

ҡаралған: 19
10:07 - 09.07.2018

Башҡортостанда бер ҡатын һәм өс баланы һыйырҙар һөҙгән. Был хәл уҙған йома Туймазы районында булған. 6, 9 һәм 10 йәшлек балалар өлкән апайҙары менән Япрыҡ ауылы янында миндек бәйләргә сыҡҡан. Йылға янында лимузин тоҡомло һыйыр көтөүе йөрөгән, улар кешеләргә һөжүм иткән. Бер нисә сәғәттән генә көтөүсе килеп һыйыр-үгеҙҙәрҙе ҡыуып ебәргән, ашығыс ярҙам саҡырған. Һыйыр тояҡтары аҫтында ҡалыусыларҙың барыһына ла медицина ярҙамы күрһәтелгән, 9 йәшлек бала ауыр хәлдә...

ҡаралған: 28
09:34 - 09.07.2018

Өфөлә теркәлгән енәйәттәрҙең 36 проценты урлашыуҙарға тура килә. Ҡала полиция идаралығынан хәбәр итеүҙәренсә, шулай уҡ наркотиктар һатыу, мутлашыу осраҡтары йыш теркәлә. Быйыл Өфөлә 8 меңдән ашыу енәйәт булған. Һәр 1 мең кешегә иҫәпләгәндә уртаса 8 осраҡ тура килә.

ҡаралған: 22
09:00 - 09.07.2018

Өфөнөң йәш эшҡыуарҙары проекттарын тормошҡа ашырыу өсөн 1 миллион һумға тиклем финанс ярҙамға дәғүә итә ала. Грантҡа бизнес-проекттар конкурсында ҡатнашыусылар иҫәп тота ала. Бәйгелә республика биләмәләрендә даими йәшәүсе, стартап йәки үҫеш стадияһындағы бизнес-проекттары булған 20 йәштән 40 йәшкә тиклемге эшҡыуарҙар ҡатнаша. Ғаризалар республика эшҡыуарҙар башланғыстары ассоциацияһының рәсми сайтында 25 июлгә тиклем ҡабул ителә.

ҡаралған: 22
08:21 - 09.07.2018

Рәсәй менән Ҡытай "йыһан интернеты"н булдырырға ниәтләй. Пекин Мәскәүгә ошондай тәҡдим менән сыҡҡан. Интернет бәйләнеше спутниктар ярҙамында тәьмин ителә. Рәсәйҙе тулыһынса хеҙмәтләндереү өсөн 70 йыһан аппараты кәрәк була, бөтә планетаны ҡаплау өсөн 300 спутник кәрәк. Был эш 100-әрләгән миллиард һумға баһалана. Ҡытай яғы иһә аҡса бирергә әҙер.

ҡаралған: 28
07:40 - 09.07.2018

Өфөлә Башҡортостан республикаһының 100 йыллығы уңайынан яңы бассейн төҙөлә. Ул Инорс микрорайонында, Төхвәт Йәнәби урамында була. 3 мең квадрат метрҙан ашыу майҙанды биләй. Объектта эштәр 2017 йылда башланған. Киләһе йылда файҙаланыуға тапшырыу планлаштырыла. Республика йәштәр сәйәсәте һәм спорт министрлығынан хәбәр итеүҙәренсә, әле Башҡортостанда бөтәһе 190 бассейн бар. Профессиональ спортсыларҙың күбеһе иһә Салауат ҡалаһында шөғөлләнә.

ҡаралған: 25
07:00 - 09.07.2018

Юғары уҡыу йортон тамамлаған һәр унынсы йәш кеше эш таба алмауы ихтимал. Был хаҡта Ил хөкүмәтенең Аналитика үҙәгенән хәбәр итәләр. Эксперттар быны хеҙмәт баҙарында юғары белемле кадрҙарҙың күп булыуы менән аңлата. Шул уҡ ваҡытта, ябай эшселәр өсөн вакансиялар күп. Шуға урта махсус белемле белгестәргә ихтыяж артҡан.

ҡаралған: 24
19:35 - 08.07.2018

Астрономдар июль айында магнит дауылдары тураһында иҫкәртә. Ҡояш еле тип тә йөрөтөлгән күренештең электр аппаратураһы эшенә йоғонто яһауы мөмкин, ауырыу йә өлкән кешеләр ҙә үҙҙәрен насар тойоуы ихтимал. Магнит дауылдары 15, 20, 22 һәм 23 июлдә күҙәтеләсәк. Һуңғыһының башҡаларынан көслөрәк булыуы көтөлә.

ҡаралған: 28
18:44 - 08.07.2018

Башҡортостан юлдарында быйыл ҡырағай хайуандарҙы бәрҙереүҙең 14 осрағы булған. Тәгәрмәстәр аҫтына башлыса мышылар һәм ҡоралайҙар эләккән. Тәбиғәттән файҙаланыу һәм экология министрлығынан хәбәр итеүҙәренсә, урман аша үткән юлдарҙа "Ҡырағай хайуандар" тигән билдәләр ҡуйыла, айырыуса эңер ваҡытында һәм төндә иғтибарлы булырға кәрәк. Хайуандар юл аша үткәндә тирә-яҡҡа ҡарамай. Тейешле билдә ҡуйылған урында водитель ҡырағай хайуанды бәрҙерһә, тәбиғәткә килгән зыянды ҡапларға тейеш була, бынан тыш 80 мең һумлыҡ административ штраф һалына, тип...

ҡаралған: 27
18:00 - 08.07.2018

Башҡортостанда йәшәүсе бер ханым үҙ ихатаһында аҫраған малдан ҡотолорға мәжбүр булған. Күршеләре судҡа мөрәжәғәт иткән. Материалдарҙан күренеүенсә, Өфө районында йәшәүсе ханым майҙаны 30 сутый ихатаһында 90 һыйыр малы тотҡан. Күршеләре тиҙәк еҫенә зарланған, бынан тыш мал-тыуар арҡаһында себен-ләпәк күпләп үрсегән. Ошоларҙы иҫәпкә алып, суд хужабикәгә малдарын кәметеү тураһында ҡарар сығарған.

ҡаралған: 32
17:06 - 08.07.2018

Башҡортостанда һыу инеү миҙгеле башланғандан алып 25 кеше, шул иҫәптән 5 бала батып үлгән. Бәхетһеҙ осраҡтарҙың күбеһе һыу инеү тыйылған урындарҙа булған. Өфөлә, мәҫәлән, Йылы күлендә батып үлеүселәр бар. Күлдә һыу инеү рөхсәт ителмәгән, яр буйҙары таҙартылмаған. Эргәләге йылылыҡ электр станцияһынан һалҡын һыу ағып төшә. Температура ҡапыл үҙгәреү арҡаһында һыу инеүселәрҙең аяҡ-ҡулдары ҡорошоуы мөмкин, тип иҫкәртә ҡотҡарыусылар.

ҡаралған: 30
16:00 - 08.07.2018

Башҡортостанда инфляция артҡан. Статистика хеҙмәте июнь айында уның кимәле 0,9 булған тигән мәғлүмәттәр бирә. Был әлегәсә теркәлгәндән иң юғары күрһәткес. Ғинуарҙа - 0,4, февралдә - 0, мартта - 0,2, апрелдә - 0,4 һәм майҙа 0,2 процентлыҡ инфляция теркәлде. Уҙған айҙа ил буйынса уның уртаса кимәле 0,6 процент булды. Аҙыҡ-түлеккә хаҡтарға килдәндә, уҙған айҙа Башҡортостанда кәбеҫтә, кишер һәм картуф ныҡ ҡиммәтләнгән. Хаҡтар ике тапҡырға артҡан. Шулай уҡ һуған...

ҡаралған: 31
15:00 - 08.07.2018

Өфөлә полиция хеҙмәткәрҙәре 4 кешене уттан ҡотҡарып ҡалған. Пекин урамында бер йортта янғын сыҡҡан. Уны эргәнән үтеп барыусы "Росгвардия" төркөмө күреп ҡалған. Полицейскийҙар янғын һүндереүселәргә ярҙамға килгән. 4 кешене сығарып табиптар ҡулына тапшырған.

ҡаралған: 28

Страницы

тура ЭФИР

Online 128 КБитс/с

105.5 FM

Аудио ағым

әле эфирҙа


Һауа торошо (Өфө)

төндә 18..20°C
иртән 20..22°C
көндөҙ 20..22°C
кис 18..20°C
www.gismeteo.ru
Текста орфографик хата:
Хата тураһында хәбәр итеү өсөн “Хата тураһында хәбәр итегеҙ” төймәһенә баҫығыҙ. Шулай уҡ һеҙ хәбәргә комметарий өҫтәй алаһығыҙ.